Fuglaflensa á Ítalíu og í Grikklandi

Evrópusambandið ætlar að herða eftirlit með svæðum á Ítalíu þar sem hið hættulega H5N1 afbrigði fuglaflensu hefur greinst í villtum fuglum.

Heilbrigðisráðuneytið á Ítalíu staðfesti í dag að flensan hefði greinst í svani sem fannst í suður hluta landsins. Sex fuglar hafa þar með greinst með flensuna þar í landi. Yfirvöld á Ítalíu hafa gripið til þeirra ráðstafana að girða af þau svæði þar sem fuglarnir hafa fundist.

Flensan hefur einnig greinst í fuglum í Norður-Grikklandi en tilfellin þar og á Ítalíu eru þau fyrstu í ríkjum Evrópusambandsins.