Steinunn Sigurðardóttir sýnir á Norðurbryggju í Kaupmannahöfn

Laugardaginn 10. júní kl. 16.00 verður opnuð sýninga á verkum Steinunnar Sigurðardóttur fatahönnuðar á Norðurbryggju í Kaupmannahöfn. Sýningin spannar tuttugu ára feril Steinunnar sem fatahönnuður og var sýningin áður í Menningarmiðstöðinni Gerðubergi frá 18. mars - 30. apríl 2006 og í tengslum við Sjónþing Gerðubergs.

Á yfirlitssýningu Steinunnar á Norðurbryggju verða sýnishorn af þeim flíkum sem hún hefur hannað í gegnum árin og á tólf sjónvarpsskjám verða myndbönd frá tískusýningum, vinnunni baksviðs, viðtöl o.fl. Steinunn hefur haldið sérstaklega vel utan um vinnu sína og hefur með skipulögðum hætti allt frá skólaárunum safnað myndum úr blöðum, myndböndum, vinnuskissum, efnisprufum og fleira sem bera vitni um framlag hennar í gegnum tíðina.

Á sýningunni gefur að líta efnis- og prjónaprufur, skissur og fleira. Einnig verða veggir þaktir með úrklippum úr tískublöðum með myndum af frægustu fyrirsætum og leikurum heims í fötum Steinunnar. Síðast en ekki síst sýnishorn af nýjustu tískulínu Steinunnar; á gínum og á stórum ljósmyndum á blindrömmum.

Sýningin í Gerðubergi vakti verðskuldaða athygli og opnaði augu margra fyrir hörðum heimi tískunnar sem flestum er hulinn. Nafn Steinunnar hefur ekki verið áberandi og er lítt þekkt meðal almennings á Íslandi þó svo að þeir sem fylgjast grannt með í þessum geira þekki verk hennar og feril vel. Hún var á dögunum tilnefnd til Sjónlistarorðunnar 2006 og vann DV verðlaunin í flokki hönnunar árið 2003 svo fátt eitt sé nefnt.

Steinunn byrjaði ung að prjóna og sauma og nam hönnum við Parsons School of Design í New York. Hún var fyrsti Íslendingurinn til að stunda þar nám og vissi í byrjun lítið um fataiðnaðinn og borgina sjálfa en á endanum dvaldi Steinunn í 13 ár í New York.

Að námi loknu vann Steinunn með fremstu fatahönnuðum heims; Gucci, Ralph Lauren, Calvin Klein og La Perla. Hennar helsti styrkleiki voru prjónaflíkur og kaðlar og þótti færni hennar á því sviði framúrskarandi. Hún vann oftast efnin frá grunni og bjó til ný efni sem aldrei höfðu sést áður.

Steinunn vann sem yfirhönnuður hjá La Perla og eftir tveggja ára starf hjá fyrirtækinu ákvað hún að snúa sér að eigin hönnun undir nafninu STEINUNN. Steinunn er með vinnustofu á Laugarvegi 59 og selur flíkurnar til Evrópu, Japans og Bandaríkjanna.

Sjá nánar http://www.steinunn.com/

Í tengslum við sýninguna opnaði vefsíða hjá Símanum www.siminn.is/steinunn þar sem hægt var að sjá myndbönd frá tískusýningum, ljósmyndir af hönnun Steinunnar og feril og verkefnum Steinunnar á löngum ferli hennar sem fatahönnuður. Vefsíðan opnað 18. mars 2006.

Sýningin á Norðurbryggju stendur til 9. júlí.