Afskipti Alþingis orsaka stjórnskipulegan vanda

Halldór Halldórsson, dómstjóri Héraðsdóms Norðurlands vestra, segir það ekki gott að Alþingi grípi fram fyrir hendur Kjaradóms eins og gert var varðandi úrskurð Kjaradóms um laun æðstu embættismanna. Dómarar íhuga nú lögsókn vegna málsins.

Halldór Halldórsson er einn þeirra dómara sem ekki er sáttur við afskipti framkvæmda- og löggjafarvaldsins af ákvörðun Kjaradóms. Hann minnir á að alþingismenn hafi sjálfir ekki viljað ákvarða eigin laun og því komið þeirri ákvörðun með lagasetningu til Kjaradóms. Það sé því óheppilegt að þeir afnemi ákvörðun Kjaradóms með lögum, burtséð frá því hver hún var.

Halldór segir vandséð hvernig leysa eigi þann stjórnskipulega vanda sem nú er kominn upp. Hins vegar verði að finna leið út úr þessum ógöngum. Allir þeir sem lögin á Kjaradóm ná yfir geti farið í mál. Halldór segir heppilegast að laun dómara verði ákveðin með svipuðum hætti og lögin um Kjaradóm gerðu ráð fyrir. Best væri að dómarar væru ekki flokkaðir með mörgum öðrum hópum. Til dæmis fari ekki vel saman að þeir séu í hóp með þingmönnum og ráðherrum líkt og þeir eru nú.

Óvíst er hvort dómarar hafi biðlund til að bíða eftir niðurstöðu þeirrar nefndar sem ríkisstjórnin hefur skipað til að fara yfir lög um Kjaradóm og kjaranefnd. Þannig hefur Guðjón St. Marteinsson, dómari við Héraðsdóm Reykjavíkur, ákveðið að höfða mál á hendur ríkinu vegna afnáms úrskurðar Kjaradóms geri Dómarafélag Íslands það ekki, að því er fram kemur í Morgunblaðinu í dag. Þar kemur einnig fram að fleiri dómarar séu sama sinnis og Guðjón. Í ályktun félagsfundar Dómarafélags Íslands frá 26. janúar kemur hins vegar fram að félagið hafi frestað ákvörðun um málshöfðun á hendur ríkinu þrátt fyrir að fundurinn véfengi að lög um afnám ákvörðunar Kjaradóms samrýmist stjórnarskránni.