Fá bílastæði ráðgerð við nýja stúdentagarða

Háskólastúdentar, sem vilja búa á nýjum stúdentagörðum sem eru að rísa í miðborg Reykjavíkur, eiga að taka strætó í skólann. Það er að minnsta kosti vilji borgaryfirvalda, sem gera ráð fyrir fáum, sem engum, bílastæðum við nýju stúdentagarðana. Þeir sem eiga bíl verða að leggja í bílastæðahúsum og greiða fyrir það fullu verði.

Hér við Lindargötuna, þar sem áfengi var áður rétt yfir búðarborðið er verið að byggja 96 einstaklingsíbúðir fyrir háskólastúdenta. Þær eiga að vera tilbúnar í ágúst, en þetta eru fyrstu stúdentagarðar sem reistir eru utan háskólasvæðisins. Að öllu jöfnu er reiknað með einu til tveimur bílastæðum á íbúð þegar hús eru byggð en í skipulagningu þessara bygginga var einungis gert ráð fyrir hálfu bílastæði á íbúð. Formaður skipulagsráðs segir að þessi niðurstaða byggi annars vegar á reynslu um bílaeign námsmanna.

Dagur B. Eggertsson, formaður skipulagsráðs segir vera staðreynd að stór hópur stúdenta vilji búa í moðborginni og spara sér rúma hálfa milljón á ári, eða því sem nemur að reka bíl. Það sé því verið að reyna að mæta kröfum þessarar nýju kynslóðar. Dagur segir ástæðu þess að ekki er gert ráð fyrir neinum bílastæðum í nágrenni stúdentagarðanna, vera þá að aðalskiptistöð höfuðborgarsvæðisins í nýja leiðakerfinu sé rétt hjá og þar gangi strætóar á innan tveggja mínútna fresti til háskólasvæðisins, sem sé mjög vel tengt í nýja leiðakerfinu. Þessir nýju stúdentagarðar verði því valkostur fyrir þá sem vilja nota strætó, búa miðsvæðis og stunda nám við háskólann.

Það verður hins vegar ekki gert að skilyrði fyrir því að fá inni þarna að menn eigi ekki bíl. Námsmenn munu ekki geta lagt í nærliggjandi götur, eins og Njálsgötu eða Grettisgötu, þar sem þar á bráðlega að setja upp stöðumæla og bjóða íbúum þeirra gatna upp á íbúakort svo þeir geti lagt við heimili sín. En námsmönnum stendur ekki slíkt kort til boða og þurfa að finna aðra lausn á sínum bílastæðavanda. Dagur segir að þeir námsmenn sem verði á bíl geti lagt bíl sínum í nærliggjandi bílastæðahúsum en þeir þurfi að borga fullt verð fyrir stæðin eins og aðrir.