Evrópumánuður ljósmyndarinnar

Í gær hófst í París ljósmyndamessan Paris-Photo og stendur fram á sunnudag. Þetta er í tíunda sinn sem messan er haldin en hún er ein mikilvægasta sýninga- og sölumessa á ljósmyndum sem haldin er í Evrópu.

Raunar hafa önnur þjóðlönd reynt að ná til sín hluta af kökunni: Fotobild-messunni er nýlega lokið í Berlín og fyrr á árinu er Photo-London.

Þennan mánuð er ljósmyndin víða í hávegum höfð í Evrópu - mánuðurinn er skilgreindur sem Evrópumánuður ljósmyndarinnar. Paris Photo tengir sig þeim hátíðahöldum enda er ljósmyndin að verða æ fyrirferðarmeiri í lífi okkar. Ljósmyndavélar eru öllum tiltækar. Stafræn vinnsla hefur gert almenningi kleift að vinna myndir sínar hraðar og betur eftir því sem hefðbundinni og nú fornri ljósmyndun er vikið til hliðar. Myndlistarmenn vinna æ meir með ljósmyndir og þær styrkja sig stöðugt í sessi sem tjáningarform.

Hundruð aðila taka þátt í Paris Photo. Vegleg sýningarskrá messunnar er nauðsynjagripur hverjum þeim sem vill fylgjast með í ljósmyndum heimsins. Ljósmyndir sem veggskraut á heimilum eru að festa sig í sessi og myndir eftir aldraða og látna meistara eru stöðugt að hækka í verði á mörkuðum.

Gallerí i8 tekur þátt í messunni í París. Mynd af Gjörningaklúbbnum skreytir opnunarsíðu á vef messunnar og Norðurlöndin skipa heiðurssess í sýningarhaldi hátíðarinnar í svokölluðum Statements-flokki. Þar er að finna myndverk eftir Rúrí og Hrafnkel Sigurðsson, auk þeirra Gjörningaklúbbskvenna.

Mikið er í gangi í sýningarhaldi á ljósmyndum þessa dagana og undarlegt að samtök ljósmyndara og sýningahaldarar skuli ekki hafa tengt sig Evrópumánuði ljósmyndarinnar: nýlega lauk sýningu Ara Sigvaldasonar í Gerðubergi. Þessa helgi lýkur sýningu pólska fréttaljósmyndarans Chris Niedenthal, í Myndadeild er safnsýning sem kalllar á nafngreiningu mynda eftir ýmsa íslenska höfunda frá ýmsum tímum, auk þess sem Spessi opnaði á laugardag sýningu í Hafnarborg sem hann kallar Locations. Og þá er hlutur ljósmyndarinnar í öðrum myndlistarsýningum ekki rakinn.

Áhugasamir um hvað sé í boði á Paris Photo geta litið á heimasíðu messunnar: www.parisphoto.fr. Þar má tengjast galleríum sem taka þátt í sýningunni og sjá hvað er þar í boði.