Kveiktu í strætó í úthverfi Parísar

Hópur hettuklæddra ungmenna, rak í nótt farþega út úr strætisvagni í úthverfi í vesturhluta Parísar og kveikti síðan í honum. Enginn slasaðist í eldinum en strætóinn er gerónýtur þrátt fyrir að slökkviliðsmenn hafi slökkt fljótt og vel í honum.

Þetta er annar strætisvagninn í vikunni sem eyðileggst eftir íkveikju og eykur það áhyggjur yfirvalda af því að upp úr sjóði á morgun þegar nákvæmlega eitt ár er síðan óeirðir brutust út í úthverfunum sem entust í þrjár vikur. Íbúar í úthverfunum hafa einnig áhyggjur af þessu enda misstu margir þeirra bíla sína í bílabrennum sem fóru eins og eldur í sinu um allt Frakkland.