Fánar, trumbur og fjölmenn reið

Myndlistarmaðurinn Halldór Ásgeirsson hefur fengið til liðs við sig rúmlega fjörutíu hestamenn sem á morgun munu fullkomna myndverk hans sem sett verður upp í tengslum við Skálholtshátíð.

Verkefnið er búið að eiga sér talsverðan aðdraganda en Halldór útskýrir að hann hafi snemma séð fyrir sér hópreið hestamanna með fána þegar hann var beðinn um að skipuleggja myndlistarverk í tengslum við Skálholtshátíð. „Þetta er eins konar samblanda af samúræja- og víkingasýnum,“ segir hann sposkur en Halldór hefur starfað mikið í Japan og kveðst vera „jójó milli þessara tveggja eyja“.

Nú fara menn um héruð í uppsveitum Árnessýslu og leita að fleiri hrossum því fjörutíu og fjögur þarf til þess að bera jafnmarga fána sem Halldór hefur hannað af þessu tilefni. „Fánarnir eru í líkamsstærð og verða festir á þriggja metra langar álstangir sem hestamennirnir bera en verður síðan komið fyrir í fánaborg fyrir neðan kirkjuna.“ Talan fjörutíu og fjórir vísar síðan til biskupanna sem verið hafa í Skálholti.

Verkið hefst á gjörningnum kl. 13 á morgun þar sem hestamennirnir fjörutíu og fjórir koma ríðandi að Skálholti með fánana við trumbuundirleik. „Ég sá fyrir mér japanskar trumbur, þessar risavöxnu parabólur sem Steintryggur notar og fékk þá til liðs við mig. Þeir munu byrja að berja trumburnar sem verða undanfari hófadynsins og þegar hestareiðin færist nær draga þeir úr sínum hljóðum. Við verðum líka að passa upp á að fæla ekki hestana.“

Halldór hefur verið að safna myndefni á fánana og leitar víða fanga. „Ég sæki í Íslandssöguna, gömul tákn og skjaldarmekri, kristileg og trúarleg tákn en einnig mín eigin tákn og teikningar. Einn fáninn verður síðan með skjaldarmerkjum nútímans - vörumerkjum,“ segir Halldór og vísar til fána sem verður skreyttur Bónussvíninu og hinu fræga Morgunblaðs „M-i“.

Hópreiðin verður án efa mjög tilkomumikil en listamaðurinn vonast vitanlega til þess að veðurguðirnir verði til friðs. „Hestamennirnir munu síðan stoppa fyrir neðan kirkjuna þar sem Gunnar Eyjólfsson mun lesa Ísleifs þátt úr biskupasögunum og síðan gengur fólk til messu inn í kirkjunni en á meðan kem ég fánunum fyrir í fánaborg fyrir eðan kirkjuna sem blasir við þegar kirkjugestir koma út.“ Fánaborgin mun síðan standa fram í ágústmánuð svo aðrir Skálholtsgestir geta einnig barið hana augum.

Halldór hefur í nógu að snúast því hann á einnig óvenjulegt verk á sumarsýningunni „Hin blíðu hraun“ í Hafnarborg þar sem hann glímir við óvenjulegan klump úr vikursteini sem hann umbreytir sjálfur með hjálp logsuðutækis. Mannhæðarhár múraður steinkassi býður hans í Hafnarfirðinum en honum ætlar Halldór að breyta í gljáandi glerung og er kominn nokkuð áleiðis. „Ég þarf kannski að huga að stórvirkari tækjum,“ segir hann bjartsýnn. Áhugasamir geta séð listamanninn að störfum á laugardögum í ágústmánuði.