Innfæddir og innflytjendur skemmta sér saman

Á fimmtudagskvöldum í sumar stendur Aljóðahúsið fyrir skemmtilegum ferðum í Reykjavík og nágrenni í þeim tilgangi að sporna gegn félagslegri einangrun innflytjenda og auka samskipti þeirra við innfædda.

Meðal annars verður boðið upp á gönguferðir, hestaferð, siglingu og hvalaskoðun en ferðirnar eru opnar öllum, bæði Íslendingum og innflytjendum sem langar til þess að gera eitthvað skemmtilegt á fimmtudagskvöldum í sumar. Fyrsta ferðin var farin síðasta fimmtudag en þá var gengið á Esjuna. Þetta tókst mjög vel og flestir fóru alla leið upp á topp. Þátttakendur voru um 25 manns, þar af um fimmtungur útlendingar, segir Helga Ólafsdóttir, upplýsingafulltrúi Alþjóðahússins.

Hún segir að ferðirnar séu ýmist ókeypis eða gegn vægu verði, en Forvarnarsjóður er styrktaraðili verkefnisins. Næsta ferð verður farin út í Viðey og er mæting í hana fyrir utan Alþjóðahús kl. 19.30 og verður komið tilbaka kl. 22.30. Áhugasömum er bent á að skrá sig degi áður í ferðina í síma 5309313.

Þátttökugjald er 600 kr. Nánari upplýsingar um næstu ferðir má fá á heimasíðunni www.ahus.is.