Fuglaflensa í ellefu Evrópuríkjum

Fuglaflensan er komin til Ungverjalands. Þrír svanir þar í landi hafa drepist úr fuglaflensu. Verið er að greina hvort veiran sé af gerðinni H5N1. Þar með hefur veiran greinst í ellefu Evrópuríkjum. Þá hafa yfir 200 dauðir fuglar sem fundist hafa víða um Danmörku verið sendir til rannsóknar í Árósum en það kemur líklega ekki í ljós fyrr en á morgun hvort þeir hafi drepist úr fuglaflensu.

Einn helsti sérfræðingur Sameinuðu þjóðanna í þessum málum segir hættuna á alheimsfaraldri vera til staðar. Veiran hafi þó ekki stökkbreyst og að enn sé hægt að koma í veg fyrir faraldur ef ríkisstjórnir heimsins verji nógum miklum peningum í verkefnið. Hann segir hættuna vera mesta í Asíuríkjum og í Austur Evrópu þar sem nákvæm tala yfir veirutilfelli eru ekk ljós. Nauðsynlegt sé að ríkisstjórnir sjái til þess að bændur loki alifugla sína inni til að minnka líkur á smiti.