Staldrar við innan veggja leikhússins

Þetta kom mér mjög á óvart og mér datt ekki í hug að ég mundi taka þetta enda fannst mér hinir sem voru tilnefndir líklegri til vinnings, segir Hugleikur Dagsson en hann var valinn leikskáld ársins á uppskeruhátíð leikhússins, Grímunni, á föstudag fyrir sýninguna Forðist okkur. Sýningin var sett upp í samvinnu við leikhópinn Common Nonsense og nemendaleikhúsið í Borgarleikhúsinu. Verkið vann einnig til verðlauna danshöfundarverðlauna ársins, en það var Ólöf Ingólfsdóttir sem sá um dans og hreyfingar í verkinu.

Hugleikur hefur vakið mikla athygli fyrir skemmtilegar og kaldhæðnar myndasögur, en bækurnar Forðist okkur, sem er safnrit, og Fermið okkur komu út hjá JPV útgáfunni og hafa bækurnar slegið í gegn. Ég er með eina myndasögu í vinnslu sem kemur út í ágúst. Hún ber nafnið Eineyðgi kötturinn Kisi og hnakkarnir, og er ég að vinna í henni núna.

Hugleikur ætlar að staldra við innan leikhússins og er þessa dagana að skrifa söngleik sem ber nafnið Leg og fjallar um unga ófríska stúlku. Leikritið átti upphaflega að vera myndasaga á ensku með heitinu Abortion en Hugleikur ákvað að breyta henni yfir í söngleik. Þetta var hugmynd sem ég og Davíð Þór Jónsson, sem sá um tónlistina í Forðist okkur, vorum búnir að vera með í maganum lengi og ákváðum láta slag standa í vor enda vinnum við vel saman. Sýningin verður sett upp í Þjóðleikhúsinu og er það í fyrsta sinn sem Hugleikur vinnur í elsta leikhúsi landsins og líkar honum það vel.

Þetta snjalla leikskáld ætlar ekki að leggja land undir fót í sumar enda hefur hann í mörgu að snúast og ætlar hann ekki að halda upp sigurinn eitthvað sérstaklega. Ætli ég horfi ekki á bresku þættina A bit of Fry and Lorry, snilldarþætti sem mér voru að áskotnast og kannski ég fái mér eitthvað kjöt að borða um helgina, segir Hugleikur ánægður með titilinn leikskáld ársins.