Sniglabandið leikur óskalög fyrir Akureyringa

Hljómsveitin Sniglabandið verður með vikulega skemmtiþætti eftir hádegi á sunnudögum á Rás 2 þar sem sveitin bregður á leik í beinni útsendingu með alls konar sprelli undir dyggri stjórn útvarpsmannsins Magnúsar Einarssonar.

Þetta er fimmta sumarið sem hljómsveitin skemmtir hlustendum stöðvarinnar sem geta hringt inn og beðið sveitina um óskalög sem hún svo spilar í beinni. Auk óskalaganna verða ýmsir fastir liðir á boðstólum eins og hljóðfæri dagsins, pistill vikunnar, útvarpsleikrit og í lok hvers þáttar geta hlustendur komið með uppskrift að lagi sem hljómsveitin flytur svo í næsta þætti.

Það er annars nóg um að vera hjá sveitinni. Innan skamms kemur út tvöföld geislaplata sem á eru skemmtileg brot úr þáttum Sniglabandsins á árunum 2003-2004 auk sautján nýlegra laga. Sniglabandið verður einnig eitthvað á ferð um landið í sumar og spilaði sveitin á þjóðhátíðarballi á Akureyri á skemmtistaðnum Rocco, sem gekk áður undir nafninu Oddvitinn. Í skemmtiþætti dagsins í dag mun sveitin senda beint út frá skemmtistaðnum og Akureyringum gefst kostur á að mæta á staðinn og biðja um óskalög og jafnvel syngja í beinni með hljómsveitinni. Þátturinn er á dagskrá milli kl. 14 og 16 svo það er bara að hrista af sér þjóðhátíðardagsþynnkuna og mæta á svæðið.