Valgeir Guðjónsson snýr aftur eftir langt hlé

Þann 17. júní hefja Stuðmenn sína árlegu landsyfirreið en fyrsti viðkomustaður verður höfuðstaður Norðurlands, Akureyri. Þetta hefur verið árviss viðburður hjá hljómsveitinni sem nú birtist landsmönnum með heldur breyttu sniði.

Eins og flestum ætti að vera kunnugt er Ragnhildur Gísladóttir endanlega hætt í hljómsveitinni og Hildur Vala Idol - stjarna getur ekki ferðast með þeim félögum líkt og hún gerði með góðum árangri fyrir ári síðan. Í hlutverki þessara stórsöngkvenna er þó engin aukvissi því Birgitta Haukdal mun kyrja öll helstu lögin ásamt Agli Ólafssyni.

Stóru tíðindin eru hins vegar þau að Valgeir Guðjónsson mun ferðast með þessari gömlu hljómsveit sinni sem hann sagði skilið við fyrir mörgum árum. Þessi kjölfesta hljómsveitarinnar hefur ekki komið saman síðan 1984 þegar Ragnhildur Gísladóttir gekk til liðs við okkur, segir Jakob Frímann Magnússon, hljómborðsleikari Stuðmanna.

Auk Birgittu og Valgeirs ætlar stórleikarinn Stefán Karl Stefánsson einnig að ferðast með sveitinni en hann er staddur á landinu við upptökur á Latabæ en er annars búsettur í Los Angeles. Stefán hljóp í skarðið fyrir Egil þegar við fórum til Danmerkur og stóð sig með stakri prýði, útskýrir Jakob þegar hann er inntur eftir veru leikarans.

Stefán er mikill tónlistamaður og getur bæði spilað á trommur og píanó, bætir Jakob við. Svo getur hann umbreytt sér í jafn fjölbreyttar persónur og Gylfa Ægis til Jónasar Jónasson þannig í raun má segja að í honum höfum við fjórtán gestasöngvara, segir Jakob.

Stuðmenn er því orðin ansi stór hópur, í raun hálfgerður stuðflokkur, þótt Jakob vilji sem minnst tengja þessa sögufrægu hljómsveit við pólítíkina. Við getum í það minnsta sagt að þetta sé fléttulisti í þremur efstu sætunum, segir Jakob og hlær. Annars hafa þessar breytingar orðið til þess að ferskir vindar blása um okkur og ný lög flæða fram, bætir hann við og segir að þeir muni jafnframt taka lög sem aldrei hafa verið flutt áður og setja þau í nýjan búning.