Ljósmyndasafarí í Reykjavík

Í júní stendur Ungmennadeild Norræna félagsins fyrir ljósmyndanámskeiði undir heitinu Safarí í miðnætursól. Það er hin norska Ellen Marie Fodstad sem kennir á námskeiðunum en hún starfar bæði sem ljósmyndari og blaðamaður.

Fyrsta námskeiðið fór fram síðastliðið þriðjudagskvöld og var það vel sótt, ekki síst af ungu fólki sem er hér á vegum Nordjobb. Námskeiðið er öllum opið en það er stílað inn á áhugaljósmyndara. Það skiptir ekki máli hvers konar ljósmyndagræjur fólk á því það er meiri áhersla lögð á ljós og sjónarhorn en sjálfar græjurnar, segir Ellen.

 Að hennar sögn fer námskeiðið þannig fram að hún heldur fyrirlestur og sýnir dæmi um góðar og vondar myndir og þátttakendur taka virkan þátt í umræðum um það hvað sé að. Að fyrirlestri loknum er haldið í smá ljósmyndasafarí um miðborgina. Nemendur á námskeiðinu fá svo þrjú verkefni til þess að spreyta sig á í júlí og hittist hópurinn svo aftur hinn 4. ágúst og þá verða bestu myndirnar valdar.

 Birtan hér á Íslandi er alveg ótrúleg. Ég veit um fleiri erlenda ljósmyndara sem hafa heillast af henni og flutt hingað, segir Ellen, sem kom fyrst til landsins fyrir einu og hálfu ári þegar hún vann að verkefni fyrir Þjóðskjalasafnið. Á þeim mánuði kynntist hún íslenskum manni og í dag er hún flutt til landsins og skrifar fyrir Iceland Review.

Þriggja tíma námskeið kostar aðeins 1.500 krónur og er Ellen með skýringu á þessu góða verði á reiðum höndum. Það verður að vera eitthvað ódýrt á Íslandi, segir hún og hlær. Næstu námskeið verða haldin 22. júní og 27. júní og geta áhugasamir haft samband við Norræna félagið.