Superman er ekki samkynhneigður

Bryan Singer, leikstjóri kvikmyndarinnar Superman Returns, hefur vísað á bug vangaveltum um að ofurhetjan skikkjuklædda sé samkynhneigð.

"Superman er örugglega gagnkynhneigðasta persóna sem ég hef leikstýrt," sagði Singer.

Fjallað var um meinta samkynhneigð hetjunnar í tímaritinu The Advocate, The Los Angeles Times og á hinum ýmsu netsíðum. Var þar meðal annars vísað í auglýsingaspjöld vegna myndarinnar.

Nýliðinn Brandon Routh fer með hlutverk Superman í myndinni en Christopher Reeve, sem lést fyrir tveimur árum, lék hetjuna í fyrstu fjórum myndunum.

Paul Levitz, forstjóri DC Comics, eiganda teiknimyndasögunnar um Superman, er sammála Singer og undrast mjög fregnirnar um samkynheigðina. "Við erum allir að klóra okkur í hausnum yfir þessu," sagði hann. "Persóna hans er ekki samkynhneigð."

Superman Returns verður frumsýnd síðar í sumar. Fjallar hún um endurkomu Supermans til jarðar eftir fimm ára fjarveru. Kemst hann að því að konan sem hann elskar, Lois Lane, á kærasta og barn.