Gerir myndband fyrir Will Oldham

Við vorum bara að djamma saman þegar þetta barst í tal. Ég hef nokkuð gaman af tónlist hans og sagðist vera til í að gera myndband fyrir hann og hann sagði já, segir Einar Baldvin Arason, 26 ára gamall kvikmyndagerðarmaður, sem gerði nýverið myndband fyrir tónlistarmanninn Will Oldham.

Í haust er von á nýrri plötu með Oldham sem hann gerir undir nafninu Bonnie Prince Billy. Myndband Einars Baldvins verður við fyrsta smáskífulag plötunnar, Cold and Wet, sem kemur út í nóvember. Eins og Fréttablaðið greindi frá fyrir skemmstu stjórnaði Valgeir Sigurðsson í Gróðurhúsinu upptökum á plötunni.

Einar Baldvin hefur getið sér gott orð fyrir þrjú myndbönd sem hann gerði fyrir reykvísku rokksveitina Jan Mayen. Hann gerði auk þess myndband fyrir bresku hljómsveitina 586. Nýja myndbandið er teiknimynd en hann hefur leikið sér talsvert með það form í myndböndum sínum.

Hann sendi mér lagið og ég gerði litla teiknimynd við það. Við hittumst ekkert út af þessu heldur vorum bara í sambandi í gegnum netið. Ég fékk mjög frjálsar hendur, segir Einar Baldvin. Hann segir að sagan í myndbandinu fjalli um lítinn björn í skógi sem hittir unga konu og verður ástfanginn af henni. Svo fer allt á versta veg hjá birninum unga og lífið gengur honum smám saman úr greipum.

Einar Baldvin hefur verið að búa til tónlistarmyndbönd í að verða þrjú ár. Hann starfar auk þess hjá Sjónvarpinu við að framleiða og klippa sjónvarpsefni. Hann segist vera mjög spenntur fyrir því að gera meira af myndböndum í framtíðinni.

Mér finnst mjög gaman að segja svona litlar sögur og það er fínt að geta dobblað einhverjar hljómsveitir til að gera fyrir þær myndbönd. Það er líka svo skrambi flókið að gera heila bíómynd að þetta er bara fín byrjun.