Velheppnað Stjörnugolf

Stjörnugolf var haldið á Grafarholtsvelli en þetta er að verða árviss viðburður. Þar koma stjörnurnar úr íslensku þjóðlífi ásamt fulltrúum íslenskra fyrirtæki og leggja góðu málefni lið með því að spila golf.

Að sögn Ágústar Guðmundssonar, sem stóð að mótinu ásamt Björgvini Vilhjálmssyni, heppnaðist mótið með eindæmum vel. Veðrið var reyndar ekki til hrópa húrra fyrir en alls mættu 82 galvaskir kylfingar og létu rokið ekkert á sig fá. „Það var ræst út á öllum teigum en leikið var með Texas Scramble fyrirkomulaginu,“ segir Ágúst en þá spila tveir saman í liði og gildir betri boltinn.

Þeir Kristján Einarsson og Snorri Hjaltason frá Landsbankanum höfðu sigur á mótinu að þessu sinni en þeir léku völlinn á 68 höggum. Stjörnukylfingur ársins varð Sigurpáll Geir Sveinsson en hann lék holukeppni við Ólaf Má, Magnús Lárússon og Nínu Geirsdóttur.

Þetta er í þriðja skipti sem mótið er haldið en að sögn Ágústar var lokaupphæðin ekki komin á hreint. „Við reiknum með að okkur hafi tekist að safna yfir einni milljón sem var takmarkið okkar,“ segir Ágúst og voru þeir félagar staðráðnir í því að halda mótið aftur að ári.