Allir geta lært að syngja

Söngkonan Ingveldur Ýr hefur kennt ungum sem öldnum að syngja og beita rödd sinni rétt. Í sumar heldur hún námskeið fyrir unglinga og fullorðna þar sem jafnvel þeir sem hljóma eins og laglausir gaularar geta lært að syngja.

Það er hægt að kenna öllum að syngja, segir Ingveldur Ýr. Fólk er misjafnlega næmt fyrir tónum - alveg eins og það er misjafnlega næmt fyrir litum. Þetta orð að vera falskur eða laglaus er dálítið misnotað. Það er til fólk sem man ekki tóna jafn vel og aðrir. Ingveldur útskýrir að á námskeiðunum sé kennd grunnbeiting raddarinnar í söng, öndun og farið yfir líkamsstöðu og raddæfingar auk þess sem kennd eru einföld sönglög. Þetta eru námskeið sem kenna heilbrigða raddbeitingu, þjálfa tóneyrað og gefa fólki innsýn í sönginn, segir hún.

Ingveldur útskýrir að þegar fólk læri að beita röddinni rétt þá lagist oft söngröddin líka. Þetta er oft tengdara raddbeitingunni sjálfri heldur en tóneyranu. Við áttum okkur ekki á því að tónheyrnin er einn hluti af heilastöðvunum en ekki í eyranu sjálfu. Um leið og röddin og allt sem tengist önduninni lagast þá fer þetta oft að vinna með, segir Ingveldur og bendir á að þá blómstri oft einhver hæfileiki sem fólk vissi ekki að það hefði.

Ingveldur hefur verið með námskeið hjá tómstundaskóla Mímis í nokkur ár auk þess að kenna raddbeitingu í fyrirtækjum og skólum víða um land. Unglinganámskeiðin eru ætluð aldurshópunum frá 12-15 ára og 16-19 ára og þar er lögð meiri áhersla á að vinna með framkomu líka. Þá notum við líka meira lög úr söngleikjum og kvikmyndum, segir Ingveldur.

Nánari upplýsingar má finna á heimasíðunni, songstudio.ehf.is.