Syndafall í stiganum

Nýjasti bar bæjarins, Barinn við Laugaveg 22, skartar skemmtilegum veggskreytingum sem vakið hafa ómælda eftirtekt gesta. Listamennirnir sem heiðurinn eiga af verkunum heita Guðmundur Hallgrímsson og Friðrik Svanur Sigurðarson, betur þekktir sem Mundi og Morri, en þeir nema báðir grafískra hönnun við Listaháskóla Íslands.

Verkin sem um ræðir eru þrjú. Eitt er í stigaganginum sem liggur upp á þriðju hæðina og sýnir það konu horfa girndaraugum á epli á meðan hárið á henni flaksast upp allan vegginn. Myndin er af Evu í aldingarðinum og sýnir syndafallið. Okkur fannst þessi saga mjög viðeigandi sem þema í veggskreytingu á skemmtistað þar sem margar syndir eiga líklega eftir að verða framdar hér inni, segir Morri. Hinar tvær myndirnar eru á miðhæðinni og eru einnig trúartengdar. Önnur þeirra sýnir prest sem er að biðjast fyrir og hin sýnir slökkvuliðsmann sem er að kljást við loga helvítis. Við erum samt hvorugir sérstaklega trúaðir,ítrekar Mundi og segir að myndin af syndafallinu hafi verið útpæld og mikil vinna lögð í hana á meðan hinar myndirnar tvær hafi verið unnar meira spontant og án fyrirfram gefinni útkomu.

Klósettin á þriðju hæðinni hafa einnig verið skreytt en verkin þar inni eru eftir bandaríkjamann að nafni Skyler. Þannig er kvennaklósettið alsett hundum á meðan strákarnir horfa á bát sökkva og þungbrýndar verur þegar þeir pissa.

Mundi og Morri hafa annars komið víða við þegar listin er annarsvegar. Morri á t.d. heiðurinn af veggskreytingunum í bakgarði Dillon og Mundi er á kafi í fatahönnun og hannaði m.a. skreytinguna á

metanstrætisvögnunum sem keyra um götur borgarinnar. Meiri samvinna er á döfinni hjá strákunum því framundan er sýning á sextán verkum þar sem klámmyndir og ástarsögur koma mikið við sögu en sýningin verður að öllum líkindum fljótlega sett upp í versluninni Kronkron. Gaman er líka að segja frá því að strákarnri hafa nú þegar fengið tilboð um fleiri vegggskreytingar í kjölfar verkanna á Barnum.