Silvía fullkomin á sviði

Þorvaldur Bjarni Þorvaldsson lagahöfundur var sáttur við frammistöðu dívunnar.

"Þetta er Silvía, þetta er það sem hún gerir. Hún gerir mann hræddan stundum en svo býr hún yfir leyndarmáli. Það er eins og hún geti togað í einhverja spotta. Enn er ein æfing eftir og við eigum bara eftir að sjá atriðið verða skemmtilegra." Þorvaldur segir atriðið enn vera að þroskast. "Það er alltaf eitthvað sem þarf að laga. Hlutir í bakvinnslu og lúkki. Það verður neglt á lokaæfingunni á morgun." Silvía lét falska tóna og óánægjuköll Grikkja í höllinni á fyrri æfingunni ekki á sig fá.

Þegar blaðamaður Fréttablaðsins náði í skottið á ofurstjörnunni var ekki annað að heyra á henni en að æfingin væri eingöngu undanfari þess sem koma skyldi í kvöld. "Æfingin var æðisleg. Hvað sem ég geri er æðislegt. Ég gæti skitið á sviðið og samt unnið keppnina," sagði Silvía rétt áður en einkabifreið hennar flutti hana á æfingu með Selmu Björnsdóttur.

Gamlir taktar gerðu vart við sig og Silvía hefur greinilega ekki látið mótlætið fara í taugarnar á sér. "Þau elska mig." Spurð af hverju gekk svona illa, þegar hún yfirgaf höllina stuttu eftir atriðið, svaraði hún á íslensku.

"Bíddu, er ekki allt í lagi." Það eru fyrstu íslensku orð hennar í langan tíma. Silvía svaraði ekki þegar hún var spurð hvort hún væri ennþá veik, en Romario sagði að hún væri með hita. Fjölmargir fylgdust með Silvíu á skjám úr fjölmiðlaherbergi hallarinnar. Menn brostu út í annað og hvöttu hana áfram.

Hún hefur ekki misst athyglina eða hörðustu aðdáendurna hér í Aþenu, þrátt fyrir skilningsleysi fjölda Grikkja á persónu hennar. Hún er orðin landsfræg hér í Grikklandi og er beðin um eiginhandaráritanir hvert sem hún fer.