Silvía Nótt dregur sig úr sviðsljósinu

Undankeppni Eurovision keppninnar er á morgun og þá stígur Silvía Nótt á sviðið fyrir hönd Íslands. Margt hefur gengið á og Gunnhildur Gunnarsdóttir hefur fylgst grannt með.

Silvía Nótt mætti ekki í partí norrænu keppandanna í Eurovision í gær. Leikkonan þurfti hvíld frá kastljósi fjölmiðlanna.

Silvía æfði ásamt Selmu í einkastúdíói síðdegis í gær.

 Jónatan Garðarsson, sem fer fyrir íslensku sendinefndinni, segir að það hafi verið sameiginleg ákvörðun hennar og hópsins í kringum Silvíu að hún hvíldi sig í gær.

Þetta væri gert svo hún gæti mætt á æfinguna í dag og sungið villulaust á fimmtudaginn.

"Ef hún hefði þurft að gera sig klára fyrir veisluna hefði hún orðið að byrja að undirbúa sig klukkan átta í morgun," sagði Jónatan: 

"Við mátum það svo að skynsamlegra væri að hún hvíldi sig."

Sögusagnir um veikindi stjörnunnar komust fjótt á kreik.

Velti fólk vöngum yfir því hvort Silvía væri í raun veik og taldi líklegra að þetta væri einungis ein af kenjum hennar.

Eftir partíið var á vörum nokkurra sænskra fjölmiðlamanna að Ágústa Eva Erlendsdóttir, sem túlkar Silvíu, hefði verið flutt á sjúkrahús með niðurgang.

Þar sem Silvía mætti ekki voru allra augu á Carolu.

Hún söng lögin sín þrjú úr keppninni, það nýjasta, Fångad av en Stormvind og Främlig.

Carola naut einnig mestrar athygli allra keppenda í veislu borgarstjórans kvöldinu áður. Um þrjátíu ljósmyndarar fylgdu henni hvert fótmál. 

Silvía fékk einnig sína athygli í veislu borgarstjórans, en þó helst frá tökuliðinu í kringum þáttinn hennar og íslenskum ljósmyndurum, en aðrir fylgdu henni einnig spöl­korn úr leið í stuttu stoppi hennar í veislunni.

Silvía naut einnig athygli fólksins utan girðingarinnar, sem skildi af almenning og veislugesti.

Það kættist við að sjá hana þrátt fyrir neikvæða fjölmiðlaumfjöllun hér í Grikklandi.