Og Vodafone með GSM hleðslubása á Landsmóti

Og Vodafone ætlar að bjóða gestum á Landsmóti hestamanna á Vindheimamelum í Skagafirði að hlaða farsíma sína án endurgjalds. Fyrirtækið verður með GSM hleðslubása fyrir langflestar gerðir farsíma á meðan mótið fer fram. Gestir á Landsmótinu geta því komið við í Og Vodafone rútunni, sem verður á svæðinu, og látið hlaða símtækin sín — óháð því hjá hvaða fyrirtæki gestir eru með símaviðskipti sín.

Og Vodafone rútan verður staðsett á Landsmótinu frá miðvikudegi og þar til Landsmótinu lýkur næstkomandi sunnudag. Þar verður einnig hægt að kaupa farsíma, Og Vodafone Frelsis skafkort og ýmiss konar útilegubúnað, svo sem stóla. Jafnframt verður Og Vodafone með kynningu á HM mörkunum í símann; þjónustu sem gerir farsímanotendum mögulegt að sjá öll mörkin frá Heimsmeistaramótinu í knattspyrnu.