Myndband Silvíu Nætur

Eurovision keppnin í Grikklandi er rétt handan við hornið. Lag Þorvaldar Bjarna, Til hamingju Ísland í flutningi Silvíu Nætur, tekur þátt í forkeppni á fimmtudagskvöldið og ef allt gengur að óskum verðum við meðal hinna útvöldu sem halda áfram í aðalkeppnina laugardagskvöldið 20.maí.

Hluti af kynningu á laginu er gerð myndbands og fóru tökur á því fram í upptökuveri fyrir aftan Loftkastalann á miðvikudaginn. Þegar Fréttablaðið bar að garði var allt á fullu en myndbandið getur reynst dýrmætt í öllu kynningarstarfinu.

Gaukur Úlfarsson sér um leikstjórnina en hann hefur fylgt Silvíu við hvert fótmál síðan dívan birtist fyrst á Skjá einum. Dansflokkur Íslands leggur einnig sitt á vogaskálarnar auk þess sem Peppe og Romario styðja dyggilega við bakið á vinkonu sinni.

Að sögn leikstjórans verður myndbandið í anda tíunda áratugarins. Við ætlum að gera þetta að ódauðlegri list, lýsir Gaukur yfir og hefur augljóslega smitast af meintum hroka Silvíu sem hefur verið óhrædd við hástemmdar yfirlýsingar. Gaukur reiknaði með að afraksturinn yrði frumsýndur um miðjan apríl og lofaði að það ætti fátt sameiginlegt með öðrum myndböndum sem Íslendingar hafa notast við í Eurovision - keppninni.

Enskur texti við lagið er klár og sá Silvía sjálf um þýðinguna. Heitið er enn hernaðarleyndarmál en verður væntanlega upplýst þegar nær dregur að frumsýningardeginum.