MA borgar tæpar 2 milljónir

Lára Stefánsdóttir, varaþingmaður Samfylkingar­innar í Norðausturkjördæmi og fulltrúi flokksins í útvarpsráði, segir RÚV mismuna þátttakendum í Gettu betur eftir búsetu.

"Allar viðureignirnar í sjónvarpshluta keppninnar fara fram í Reykjavík og því fylgir mikill ferðakostnaður fyrir skóla utan af landi. Nemendur Mennta­skólans á Akureyri þurfa að fara þrisvar suður og útlit fyrir að kostnaður nemendafélags skólans verði um ein og hálf milljón króna."

Lára segir RÚV mælast til þess að fjölmennur stuðnings­hópur fylgi keppnisliðunum og á þriðja hundrað nemenda hafi fylgt liði MA.

"Suðurferðirnar þrjár kosta á fjórðu milljón króna en að óbreyttu mun RÚV einungis greiða um 1,6 milljónir króna," segir Lára.

Lára hefur hefur komið mótmælum við kostnaðarþátttöku RÚV á framfæri við Pál Magnússon útvarpsstjóra og hyggst einnig taka málið fyrir á fundi útvarpsráðs.

Lið Menntaskólans á Akureyri mætir liði Verzlunarskóla Íslands í úrslitaviðureign keppninnar næstkomandi fimmtudag.