Vilja að nemendur geti valið land

Námsmannahreyfingarnar á Íslandi hafa síðustu árin verið sammála um að Lánasjóður íslenskra námsmanna (LÍN) eigi að lána fyrir skólagjöldum í grunnnámi erlendis. Þetta segir Heiður Reynisdóttir, framkvæmdastjóri Samtaka íslenskra námsmanna erlendis. "LÍN lánar nú þegar fyrir skólagjöldum í grunnnámi hér heima," segir hún. "Það skiptir máli að fólk hafi val um námsland." Heiður fagnaði áhuga Verslunarráðsins á námsmönnum erlendis og vonaðist eftir frekari rannsóknum í kjölfarið á mikilvægi náms erlendis fyrir íslenskt atvinnulíf. Um minnkandi aðsókn íslendinga í nám í Bandaríkjunum segir Heiður að hryðjuverkaárásirnar 11. september 2001 skipti máli. "Við töldum okkur skynja stífari kröfur og meiri skriffinnsku í kringum umsóknir um nám þar þótt reglurnar breyttust óverulega." Einnig telur hún að óhagstætt gengi og hækkandi skólagjöld síðustu árin skipti máli. Hún vakti líka athygli á því að íslenskum nemendum í Þýskalandi hefði einnig fækkað mjög mikið síðustu árin.