Ný byggð við Elliðavatn

Úthlutun á lóðarétti í íbúðabyggðinni í Þingum við suðvesturhluta Elliðavatns hófst fimmtudaginn 16. júní og er umsóknarfresturinn um hálfur mánuður. Lóðaúthlutun á að vera lokið í byrjun júlí og hefja á byggingarframkvæmdir næsta vor. Gert er ráð fyrir að hverfið byggist upp á tveimur til þremur árum. Gert er ráð fyrir 276 íbúðum á deiliskipulagssvæðinu sem er 37 hektarar. Lóðunum verður úthlutað af bæjarráði Kópavogs í samræmi við reglur frá árinu 2002 sem finna má í heild sinni neðst til hægri á www.kopavogur.is. "Við erum með mjög stífar reglur fyrir umsækjendur," segir Gunnar I. Birgisson, bæjarstjóri í Kópavogi. Bæjarráð Kópavogs fer yfir umsóknirnar á bæjarráðsfundi með hliðsjón af reglunum. Samkvæmt þeim er til að mynda óheimilt að framselja lóð fyrr en hús er fokhelt, einstaklingar þurfa að leggja fram skriflega staðfestingu frá banka eða lánastofnun um greiðsluhæfi og ekki má mismuna umsækjendum eftir búsetu. Bæjarráði er heimilt að taka tillit til sérstakra aðstæðna umsækjanda. Samkvæmt reglunum á að draga á milli umsækjenda ef einhverjir reynast jafnir að loknu mati. Ef tvær eða fleiri umsóknir um lóð eru jafnar að loknu mati á þeim er dregið á milli þeirra í bæjarráði. "Við höfum þó aldrei dregið enn," segir Gunnar, sem á ekki von á því að til þess komi. Ekki liggur fyrir hve langan tíma tekur að fara yfir umsóknirnar, en það fer að mestu eftir því hve margar þær verða. Gunnar vill engu spá fyrir um það hve margir muni sækja um lóðir en segir þó "Við erum vinsælir." Einnig verður öldrunarþorp á vegum DAS á svæðinu og er gert ráð fyrir 140 íbúðum í því, auk þjónustumiðstöðvar fyrir aldraða með 160 sjúkrarúmum. Leikskóli fyrir Vatnsendasvæðið verður jafnframt í hverfinu.