Allt að 42 daga bið eftir einkunn

Þrátt fyrir reglur Háskóla Íslands um að kennarar hafi að hámarki þrjár vikur til að fara yfir prófin og skila einkunnum eru dæmi um allt að 42 dagar líði frá prófdegi, eða einn og hálfur mánuður án þess að einkunn hafi verið skilað. Flestum einkunnum hefur þegar verið skilað en sjö áfangar eru nú í vanskilum að því er greint er frá á vefnum prof.is. Nemendur sem tekið hafa námslán fyrir síðustu skólaönn og bíða enn einkunna geta ekki fengið greitt úr Lánasjóði námsmanna fyrr en öllum einkunnum hefur verið skilað og því ljóst að mikill dráttur á einkunnum kann að valda þeim vandræðum. Auk þess að fá ekki greitt frá LÍN tapa þeir nemendur sem eiga von á að þurfa að fara í upptökupróf tíma með hverjum deginum sem líður.