Olís og Esso borguðu ekki

Olíufélögin áttu að greiða Ríkissjóði einn og hálfan milljarð króna í sekt í dag fyrir ólöglegt verðsamráð. Skeljungur greiddi sinn hluta en hin félögin draga lappirnar. Félögin óskuðu öll eftir því að reiða fram bankatryggingu fram að úrskurði dómstóla í málinu en fjármálaráðuneytið hefur hafnað því. Lögmenn félaganna telja það hins vegar mannréttindabrot. Fjármálaráðuneytið féllst ekki á að Olís, Esso og Skeljungur fengju að leggja fram bankatryggingu þar til dómstólar hefðu kveðið upp dóma í málinu. Bent er á að reglan sé sú að einstaklingar sem geri athugasemdir við álagningu skatta þurfi að kæra úrskurð skattstjóra. Greiða þurfi hins vegar samkvæmt fyrri álagningu þar til úrskurður sé kveðinn upp í kærumálinu. Sama verði að ganga yfir olíufélögin. Lögmenn olíufélaganna benda hins vegar á að þótt þessi regla gildi í skattarétti sé það einsdæmi. Í refisrétti. þurfi menn ekki að sæta refsingu fyrr en endanleg dómsniðurstaða liggi fyrir. Mannréttindaákvæði stjórnarskrárinnar tryggi það. Séu sektirnar ígildi refsingar í skilningi laganna eigi sú regla við. Olíufélögin telja rök ráðuneytisins ennfremur léttvæg þegar litið sé til grænmetismálsins svokallaða þar sem höfuðpaurarnir hafi fengið að leggja fram viðlíka tryggingar. Ker, eignarhaldsfélag Esso, á að greiða 490 milljónir í sekt. Kristinn Hallgrímsson, lögmaður Kers, segir að greiðsluseðlar ráðuneytisins beri ekki dráttarvexti svo ekkert reki sérstaklega á eftir mönnum. Formlegt svar frá ráðuneytinu hefði enn ekki borist en ákvörðun um framhaldið yrði tekin þegar það bærist. Sektin yrði þó ekki greidd í dag. Það er Olís sem ber að greiða hæstu sektina, eða 560 millljónir. Forsvarsmenn Olís hafa ekki viljað tjá sig um málið við fjölmiðla. Samkvæmt heimildum fréttastofu ætlar félagið ekki að greiða sektina í dag og bíður líkt og Esso eftir formlegu svari ráðuneytisins. Árni Ármann Árnason, lögfræðingur hjá Skeljungi, sagði fyrr í dag að formlegt svar ráðuneytisins hefði borist og sektin yrði greidd fyrir lokun, alls 460 milljónir. Hann sagði að forsvarsmenn félagsins væru þó afar ósáttir við afstöðu ráðuneytisins í málinu. Olíufélögin hafa þegar lýst því yfir að málinu verði áfrýjað til dómstóla en áfrýjunarfrestur rennur út í lok júlí.