Fimm létust í Pakistan

Að minnsta kosti fimm létust og tugir særðust er sjálfsmorðssprengjuárás var gerð í borginni Karachi í Pakistan í gærkvöld. Sprengjutilræðið átti sér stað í miðri bænastund í mosku sjíta-múslima. Mikil reiði braust út eftir árásina og gekk fólk berserksgang í hverfum nálægt moskunni, kveikti í bílum og braut rúður í nærliggjandi húsum og verslunum. Sjálfsmorðsárásarmaðurinn er talinn vera um tvítugt. Mikið hefur verið um sjálfsmorðsárásir á sjíta-múslima að undanförnu en fyrir aðeins þremur dögum sprengdi maður sig í loft upp í hópi sjíta og féllu þá tuttugu í valinn.