Íslenskir búvörur erfðabreyttar

"Öll umræða um þessi mál hefur verið afar einsleit og grandvaraleysi bænda algjört," segir Ólafur R. Dýrmundsson landbúnaðarráðunautur vegna samkomulags sem náðst hefur milli Félagasamtaka bænda og líftæknifyrirtækisins ORF-Líftækni um tilraunaræktun á erfðabættu byggi í sveitum landsins. Ólafur segir flotið að feigðarósi enda séu allar rannsóknir lítt á veg komnar og ekki tímabært að prófa erfðabætt efni í viðkvæmri náttúru Íslands. "Það er með eindæmum hversu vel hefur tekist að koma boðskap um ágæti þessa verkefnis á framfæri og fáa rennir í grun hversu lítið er í raun vitað um slíkar rannsóknir. Þetta ákveðna fyrirtæki hefur aðeins starfað örfá ár og ég fullyrði að lítið sem ekkert er vitað um áhrif erfðabreytta lífvera á íslenska vistkerfið. Fyrir utan allt það slæma umtal sem erfðabreytingar hafa fengið víða er engin leið að sjá að það erfðabreytta yrki sem ORF er að þróa gagnist hér á landi til ræktunar á korni. Ég sé fyrir að bændur kaupi fremur ódýrari vöru frá útlöndum, séu þeir á annað borð að skoða ræktun fyrir alvöru." Ólafur segir að dæmin sýni og sanni að fara verði varlega og ótti manna í Evrópu sé ekki ástæðulaus. "Það er ástæða fyrir því að farið er varlega í flestum öðrum löndum heims og aðeins er rúm vika síðan fjölmörg héruð víða í Evrópu fóru fram á að fá sérstakan stimpil fyrir að leyfa ekki notkun á erfðabreyttum lífverum á viðkomandi svæðum. Slíkt er afar neikvætt í hugum margra." Rætt verður um málið á Bændaþingi í dag en Haraldur Benediktsson, formaður Bændasamtakanna, segir bændur almennt jákvæða gagnvart rannsóknum og þróun erfðrabreytta lífvera. "Margir rugla saman erfðabreyttum lífverum annars vegar og erfðabreyttum matvælum hins vegar. Mín skoðun er sú að bændur hafa hag af frekari rannsóknum en það liggur ljóst fyrir að ekkert verður prófað í náttúrunni sjálfri nema full vissa sé um að enginn skaði hljótist af."