Lóðum þinglýst til varnar braski

Borgarráð tekur á næstunni ákvörðun um hvort 30 lóðum undir einbýlishús við Lambasel í Breiðholti verði úthlutað með hefðbundnum hattardrætti eða haldið verði útboð eins og gert var í Norðlingaholti. Lóðirnar verða fyrst auglýstar í Stjórnartíðindum og verður það einhvern tímann á næstunni. Þegar lóðunum hefur verið úthlutað verður þeim þinglýst hjá sýslumannsembættinu til að koma í veg fyrir að lóðarhafi selji lóðina aftur í stað þess að skila henni aftur til borgarinnar ef honum snýst hugur um húsbygginguna. Þannig hyggjast borgaryfirvöld tryggja að lóðarhafi byggi á lóðinni. Dagur B. Eggertsson, formaður skipulags- og bygginganefndar, segir að verið sé að skoða úthlutunarleiðirnar tvær, m.a. með tilliti til þess hvernig hagsmunum borgarbúa verði best borgið á tímum hækkandi lóðaverðs. Borgaryfirvöld fylgjast grannt með umræðunni um lóðaverð og því hvað þessi rúmlega tíundi hluti af fasteignamarkaðnum hefur á aðra hluta markaðarins. Með því að þinglýsa lóðunum segir Dagur að verði neglt fyrir þá glufu að fjármálafyrirtæki eða verktakar geti fengið lóðirnar og selt síðan aftur. "Ekki nema verktakar fái lóð sem einstaklingar og ætli að búa þarna sjálfir. Það verða allir að vera jafnir í þess." Verð lóðanna hefur ekki verið ákveðið enda getur það mótast af því hvaða úthlutunarleið verður farin. Dagur bendir á að lóðir séu verðmætar í eðli sínu og telur ekkert endilega um brask að ræða. "Vandinn í þessu snýr að því að þarna eru stjórnvöld að úthluta gæðum og þá vill maður gera það á eins réttlátan hátt og hægt er og reyna að sníða leikreglurnar þannig að það sé ekki einn umfram annan að fá einhver gæði ókeypis sem hann síðan selur næsta manni."