Útgerðir íhuga málssókn

Á næstu vikum skýrist hvort útgerðir fara í mál við olíufélögin til greiðslu skaðabóta vegna ólöglegs samráðs þeirra. Friðrik J. Arngrímsson, framkvæmdastjóri Landssambands íslenskra útvegsmanna (LÍÚ), segir mögulega málshöfðun hafa verið til skoðunar innan sambandsins, en ákvörðun um hana sé á hendi félaganna sjálfra. "LÍÚ fer ekki í mál sem slíkt heldur er það ákvörðun hverrar útgerðar. En við vorum í viðræðum við olíufélögin og ljóst orðið að þar verða ekki gerðir samningar," segir hann og bætir við að aðstæður útgerða og afstaða til málsins kunni að vera mismunandi. "Sumir voru tengdir heimsmarkaðsverði og aðrir keyptu olíu á svokölluðu listaverði. Það kemur fljótlega í ljós hvort menn ætla í mál," segir hann og telur ekki ólíklegt að einhver útgerðarfélög gætu þá tekið sig saman um einhvers konar samrekstur mála. Landssambandið fékk í maílok afhent gögn úr ákvörðun samkeppnisráðs um samráð olíufélaganna sem áður höfðu verið bundin trúnaði. Friðrik segir þarna hafa verið tölulegar upplýsingar sem hjálpað gætu útgerðarmönnum að gera kröfur um bætur, en lögmenn hafa skoðað þau gögn.