Fagnaðarefni að mati Læknafélags

"Þetta sýnir og sannar hversu lítill hluti læknastéttarinnar er þarna um að ræða og það er fagnaðarefni að Landlæknir geti tekið á málum tengdum þeim er ávísa ávanabindandi efnum í meira mæli en eðlilegt er," segir Sigurbjörn Sveinsson, formaður Læknafélagsins. Hann segir ekkert nýtt í því að hér á landi séu einstöku læknar að ávísa sjúklingum sínum óeðlilegu magni af morfíni eða öðrum ávanabindandi efnum en nú sé hægt að finna viðkomandi aðila strax með hjálp nýs lyfjagagnagrunns sem Landlæknir hefur aðgang að en Læknafélagið barðist fyrir að sá grunnur yrði settur á laggirnar. Grunnurinn gerir allt eftirlit með lyfjaávísunum mun einfaldara en áður var og öll óvenjuleg frávik eru rannsökuð. "Hér á landi eru um 800 starfandi læknar og það er alveg við því að búast að stöku læknar sýni útbrunaeinkenni eins og gerist í öllum öðrum starfsstéttum. Einkennin eru fjármálaóreiða og almennt kæruleysi og þessu fólki og skjólstæðingum þeirra þarf að koma til hjálpar. Því ber að fagna að hægt sé að finna viðkomandi fljótt og örugglega."