Lífi dansks ráðherra ógnað

Ráðherra innflytjendamála í Danmörku segist vera bæði slegin og reið eftir að kveikt var í bíl hennar og íbúðarhúsi snemma í morgun. Óþekkt samtök segjast vera að refsa Dönum fyrir kynþáttahatur. Danska Ritsá-fréttastofan segir að áður óþekktur hópur mótmælenda hafi lýst verknaðinum á hendur sér og sagt íkveikjuna vera til þess að mótmæla kynþáttahatri danskra stjórnvalda. Rikke Hvilshöj, sem er þrjátíu og fimm ára gömul, tók við embætti ráðherra innflytjendamála í febrúar síðastliðnum. Hún var, ásamt fjölskyldu sinni, sofandi þegar kveikt var í bílnum. Eldurinn barst í íbúðarhús þeirra en var þá uppgötvaður og slökkviliðið kom snarlega á vettvang. Bíllinn er ónýtur og íbúðarhúsið talsvert skemmt en fjölskylduna sakaði ekki. Hvilshöj segir að hún sé bæði slegin og reið yfir þessum atburði en að hann muni ekki hafa nein áhrif á stefnu ríkisstjórnarinnar; hún beygi sig ekki fyrir hryðjuverkamönnum. Ráðherrann fór til vinnu sinnar í dag eins og ekkert hefði í skorist. Danska ríkisstjórnin vann stórsigur í þingkosningum árið 2001 með loforðum um að herða mjög reglur um innflytjendur. Hún var svo endurkjörin í febrúar. Síðan 2001 hefur innflytjendum til Danmerkur fækkað um heil áttatíu prósent. Anders Fogh Rasmussen forsætisráðherra fordæmdi íkveikjuna, sem og leiðtogar stjórnarandstöðunnar.