Einn lax á fyrsta degi Norðurár

Laxveiðin á landinu hófst í gær með opnun Norðurár. Framan af leit út fyrir að ekki tækist að ná laxi á land en um níuleytið í gærkvöldi veiddist átta punda hrygna. Það var María Anna Clausen sem veiddi laxinn á flugu sem er nefnd í höfuðið á henni. María Anna er annar eigandi Veiðihornsins en það var eiginmaður hennar, Ólafur Vigfússon, sem hannaði og hnýtti fluguna. Hrygnan átta punda kom á land við Munaðarnes en skömmu áður hafði María Anna misst einn. Blanda er næsta laxveiðiá sem verður opnuð en það verður 5. júní. Haraldur Eiríksson hjá Stangaveiðifélagi Reykjavíkur segir að þó veiðin í Norðurá hafi ekki byrjað vel hafi í gærkvöldi og í morgun sést til nokkurra laxa í ánni og vonast hann eftir frekari veiði í dag.