Stunduðu veggjakrot fyrr á öldum

Skólapiltar í Skálholti stunduðu veggjakrot fyrr á öldum og biskupar voru vel haldnir miðað við almúgann, samkvæmt því sem fornleifauppgröftur í Skálholti hefur leitt í ljós. Við fornleifauppgröftinn í Skálholti er verið að rannsaka aðsetur biskups og skólahús á tímabilinu 1630 til 1780 og er reynt að varpa ljósi á það líf sem menn lifðu á þeim tíma. Stórbruni var í Skálholti árið 1630 sem eyðilagði margar byggingar á svæðinu en við uppgröftinn hefur ýmislegt athyglisvert komið í ljós. Hafist var handa við uppgröftinn sumarið 2002 en verkefninu lýkur ekki fyrr en næsta sumar. Gavin Lucas verkefnisstjóri segir varðveislu staðarins ótrúlega, miklu betri en búist hafði verið við. Hann segir aukinn skilning á daglegu lífi fólksins sem bjó þarna á þessum tíma vera aðalmarkmið verkefnisins. Skólapiltar í Skálholti fyrr á öldum kunna ef til vill að hafa stundað veggjakrot því við fornleifauppgröftinn hafa fundist vegghleðslur með rúnum. Þá hafa margir smáhlutir komið í ljós, meðal annars brot af postulínsborðbúnaði, hlutar úr vínflöskum, víntappar og mynt og ýmislegt sem tengist bókum. Margt þykir benda til þess að biskuparnir í Skálholti hafi haft það gott. Í heimildum er talað um fátæklegan búnað eins og aska og tindiska til að borða af en við uppgröftinn hefur fundist dýrasta postulín og leirker sem fáanlegt var í Evrópu á þessum tíma. „Svona hlutir eru góð vísbending um það hvernig daglegt líf var hérna,“ segir Lucas. Þegar fornleifauppgreftrinum lýkur í Skálholti næsta sumar er markmiðið að leyfa almenningi að kynna sér fornminjarnar. Sérstakri aðstöðu verður komið upp þar sem fólk getur gengið um og skoðað svæðið.