Vilja nýjan R-lista án VG

Tillögur eru innan raða Framsóknarflokksins og Samfylkingarinnar um að flokkarnir bjóði fram sameiginlega í næstu borgarstjórnarkosningum og haldi þannig merkjum R-listans á lofti. Einnig er rætt um aðkomu óháðra og Frjálslyndra að nýju kosningabandalagi undir merkjum R-listans, svo og þeirra úr röðum Vinstri grænna sem vilja hag R-listans sem mestan. Vinstri grænir í Reykjavík halda félagsfund í dag þar sem ákveðið verður hvort flokkurinn bjóði fram undir merkjum R-listans í komandi borgarstjórnarkosningum eða hefji undirbúning að framboði undir eigin merkjum. Fastlega er búist við því að Vinstri grænir ákveði að bjóða fram sjálfir enda þótt skiptar skoðanir séu innan raða flokksins. Björk Vilhelmsdóttir, borgarfulltrúi Vinstri grænna, segir meginmáli skipta að halda Sjálfstæðisflokknum frá völdum. "Ég man hvernig það var að starfa þegar Sjálfstæðisflokkurinn stjórnaði hér öllu. Þá tíma vil ég ekki upplifa aftur. Ég mun því tala um fyrir áframhaldandi R-listasamstarfi," segir Björk. Viðmælendur Fréttablaðsins innan raða Framsóknarflokksins og Samfylkingarinnar segja áhugann á kosningabandalagi til staðar hjá mörgum stuðningsmönnum R-listans en margir séu slíku mótfallnir innan flokkanna og telja kominn tíma á að láta reyna á fylgi flokkanna í Reykjavík. Er jafnan bent á að ekkert sé því til fyrirstöðu að mynda kosningabandalag með þátttöku Frjálslyndra og óháðra en þannig væri hægt að ná breiðri samstöðu og mynda kosningabandalag fleiri aðila en aðeins Framsóknar og Samfylkingar. Flokkarnir síðastnefndu halda einnig félagsfundi í vikunni þar sem búast má við ákvörðun um framboðsmál þeirra.