Lucas slyngur samningamaður

George Lucas, framleiðandi Stjörnustríðsmyndanna, er líklega einn slyngasti samningamaður sem sögur fara af. Hann samdi nefnilega um að hann fengi einn allar tekjur af hvers konar framleiðslu á vörum tengdum myndunum. Það eru nú liðin 28 ár síðan hin frægu upphafsorð „Einu sinni, fyrir langa löngu, í sólkerfi langt langt í burtu,“ runnu niður hvíta tjaldið. Það var auðvitað fyrsta Star Wars myndin. Sjötta og síðasta myndin verður svo frumsýnd í Cannes í dag. Það er líklega óhætt að halda því fram að Star Wars er best heppnaði framhaldsmyndaflokkur sögunnar og fram til þessa hefur hann skilað 235 milljörðum króna í kassann. Þeir sem fjármögnuðu gerð myndaflokksins mega auðvitað vel við una en þeir naga sig sjálfsagt enn í handarbakið yfir samningnum sem þeir gerðu við leikstjórann, George Lucas. Þetta var fyrir 28 árum og þá var ekki byrjað á neinni hliðarframleiðslu við kvikmyndir svo sem á dúkkum og öðrum leikföngum. Þeir féllust því fúslega á þá kröfu Lucas að hann fengi einn allar tekjur af hvers konar hliðarframleiðslu. Sú framleiðsla hefur skilað honum 603 milljörðum króna.