Hávaði í mötuneytum geti leitt til heyrnaskaða

Hávaði í mötuneytum sumra grunnskóla í Reykjavík er slíkur að það getur leitt til þess að börn skaðist á heyrn. Nýjar hljómælingar sýna að mesti hávaði er töluvert yfir viðmiðunarmörkum Umhverfissviðs borgarinnar í að minnsta kosti einum skóla og nálægt mörkunum í tveimur öðrum.

Hollustushættir Umhverfissviðs Reykjavíkurborgar gerðu í október síðastliðnum hljóðmælingu í spinningsölum fimm líkamsræktarstöðva og í mötuneytum fimm grunnskóla í borginni eftir að kvartanir höfðu borist um mikinn hávaða þar. Í ljós kom að hávaði í spinningsölum mældist minnien búist hafði verið við en í mötuneytum var hávaðinn aftur á mótimeirien menn héldu.

Gunnar Kristinsson, heilbrigðisfulltrúi hjá Hollustuháttum Umhverfissviðs Reykjavíkurborgar, segir töluverðan hávaða í mötuneytunum og hann sé of mikill að mati Umhverfissviðs, sérstaklega hvað varðar hæstu hljóðtoppa.

Gunnar segir þetta alvarlegt og að frekari mælingar séu fyrirhugaðar af þeim sökum.Eftir áramót verði farið í hljóðmælingar í öllum mötuneytum í grunnskólunum og athugað hvernig ástandið sé. Það geti þó verið þannig að niðurstöðurnar séu ýktar þar sem mælingar hafi farið fram í þeim skólum þar sem kvartað hafi verið.