Sjö handteknir á Spáni

Spænska lögreglan handtók í gær sjö menn sem talið er að hafi fjármagnað aðgerðir hryðjuverkasamtaka sem tengjast al-Kæda. Málið teygir sig víðar og búist er við fleiri handtökum í Evrópu á næstunni.

Spænska lögreglan gerði rassíur í nokkrum húsum í Malaga, Marbella og Torremolinos í gær og fyrradag. Að sögn dagblaða á Spáni eru sjömenningarnir sem voru handteknir allir frá Alsír, sex karlmenn og ein kona. Öll hafa þau legið undir grun í nokkra mánuði, en lögreglan lét ekki til skarar skríða fyrr en í gær.

Í leit lögreglunnar fundust gögn sem benda til þess að hópurinn hafi hjálpað til við að fjármagna starfsemi alsírskra hryðjuverkasamtaka, sem hafa lýst stuðningi við al-Kæda. Þá hafa sjömenningarnir einnig hjálpað til við að skipuleggja hryðjuverk á vegum samtakanna.

Í leitinni fannst þó ekkert sem bendir til að árás hafi verið yfirvofandi á næstunni. Hins vegar virðist málið teygja sig víðar, því margt bendir til að í nágrannalöndum Spánar sé einnig fólk sem tengist samtökunum og hefur spænska lögreglan gert kollegum sínum þar viðvart. Ekki er ólíkilegt að fleiri verði handteknir vegna málsins á næstunni.