Flugvélar hafi millilent a.m.k. 67 sinnum á Íslandi

Vélar á vegum bandarísku leyniþjónustunnar hafa millilent í Keflavík og Reykjavík 67 sinnum síðan 2001. Íslensk stjórnvöld vissu ekkert um málið og þingmaður hefur krafist lögreglurannsóknar á því, hvort að fangar séu fluttir um íslenska lofthelgi og pyntaðir.

Það er ekkert gríðarlega flókið mál að afla sér upplýsinga um meint leyniflug CIA. Fréttastofa Stöðvar 2 hefur í dag lesið saman uppplýsingar frá Flugmálastjórn Íslands um millilendingar véla hér á landi við upplýsingar um skráningarnúmer flugvéla, eigendasögu þeirra og núverandi eigendur. Afraksturinn er listi með 67 skiptum þar sem vélar á vegum skúffufyrirtækja CIA hafa millilent hér á landi.

Gavon Holding & Leasing heitir eitt fyrirtækið og er samkvæmt New York Times gervifyrirtæki sem CIA heldur úti. Path Corportation er annað nafn sem talið er víst að sé gervifyrirtæki. Aviation Specialties Inc., Stevens Express Leasing Inc., Alameda Corporation, allt eru þetta fyrirtæki sem eru á vegum CIA.

Listinn er langur en gervifyrirtæki leyniþjónustunnar eiga það sameiginlegt að vera með skrifstofur heldur eru þau skráð í pósthólfum eða á skrifstofum lögmanna. Alameda er reyndar skráð á miðri flugbraut í Texas. Stjórnendur og eigendur fyrirtækjanna eru ekki til í raunveruleikanum.

Vélarnar sem þessi félög reka skipta oft um skráningarnúmer og flytjast á milli fyrirtækja. Í það minnsta ein vélin, MacDonald Douglas 82 sem hefur komið hingað til lands í það minnsta níu sinnum og er nú skráð í eigu Alameda Corporation, var áður skráð í eigu bandaríska dómsmálaráðuneytisins. Listinn sem Stöð 2 tók saman er engan veginn tæmandi en hann má nálgast hér fyrir neðan.

Þessar flugferðir fóru og fara enn fram með mikilli leynd og þrátt fyrir fyrirspurnir fjölmiðla um allan heim og stjórnvalda, meðal annars hér á landi, gefa Bandaríkjamenn engar upplýsingar, hvorki neita né játa.

Íslenskir ráðamenn segjast ekkert hafa vitað. Halldór Ásgrímsson forsætisráðherra segir þó að auðvitað viti stjórnvöld að verið sé að framselja afbrotamenn á milli landa með eðilegum og löglegum hætti en hann hafi ekki vitað til þess að það hafi verið sérstaklega á borði íslenskra stjórnvalda.

Hann segir það út í hött og ástæðu til að fordæma það ef menn flytji fanga á milli landa til þess að geta beitt einhverri annarri tækni og pyntingum til að ná upplýsingum. Það sé athæfi sem enginn geti varið og vonandi sé svo ekki. Halldór segir að ef eitthvað þessu líkt viðgangist sé það alveg ljóst af hálfu íslenskra stjórnvalda að þau vilji ekki eiga neinn þátt í því frekar en aðrar þjóðir í Evrópu.

Hvort mótbárur Íslendinga myndu breyta nokkru er vafamál. Danir hafa beðið Bandaríkjamenn að hætta flugi á vegum CIA um danska lofthelgi og Ungverjar vilja heldur ekki sjá vélarnar, en þær eru samt sem áður enn þá á ferð á þessum svæðum.

Hér heima vakna spurningar um hvað beri að aðhafast. Helgi Hjörvar alþingismaður sendi í dag dómsmálaráðherra bréf þar sem hann fór fram á opinbera lögreglurannsókn á ferðum vélanna um íslenska lofthelgi. Helgi segir að föngunum sé meinað um réttarstöðu stríðsfanga og að sterkur grunur leiki á því að þeir séu beittir pyntingum við yfirheyrslur. Refsa beri eftir íslenskum hegningarlögum fyrir brot sem framin séu innan íslenska ríkisins þó að um erlent loftfar sé að ræða. Dómsmálaráðherra verður þó að fyrirskipa rannsókn og málshöfðun.

Helgi vill að rannsakað verði hverjir hafi verið fluttir með þessum hætti, hvenær, hvaðan, hvert og hver afdrif þeirra hafi orðið á áfangastað. Þá verði að kanna hverjir séu ábyrgir fyrir flutningunum og þeir handteknir komi þeir til landsins á ný.