Mjög góður árangur hjá ungum ökumönnum í SAGA ökuritaverkefni VÍS

Mjög góður árangur náðist í SAGA ökuritaverkefni Vátryggingafélags Íslands fyrir unga ökumenn sem er nýlokið. Er meðaleinkunn unga fólksins ríflega helmingi betri en hjá öðrum, sem notað hafa ökuritann reglulega. Sturla Böðvarsson samgönguráðherra afhenti þremur stigahæstu ungmennunum verðlaun og viðurkenningu frá VÍS þegar greint var frá niðurstöðum verkefnisins í dag. Um var að ræða nokkurs konar góðaksturskeppni þar sem Tinna Guðrún Lúðvíksdóttir, 18 ára, úr Vogum á Vatnsleysuströnd stóð sig best. Hún hreppti að launum ferð í ökuskóla BMW í Þýskalandi. Stefán Smári Jónsson, 17 ára, frá Egilsstöðum varð í öðru sæti og Hrannar Freyr Hallgrímsson, 19 ára, úr Kópavogi í því þriðja. "Niðurstaðan er mjög góð í heildina og fór fram úr björtustu vonum okkar," segir Ragnheiður Davíðsdóttir, forvarnar- og öryggismálafulltrúi VÍS. "Meðaleinkunn unga fólksins í verkefninu var 0,1 en meðaleinkunn annarra hópa sem nota Saga-ökuritann er á bilinu 0,2-0,3, þannig að árangur ungu krakkanna er meira en helmingi betri." Alls sóttu um 100 ungmenni um að fá að taka þátt í SAGA ökuritaverkefninu og voru 18 þátttakendur valdir úr hópnum eftir aldri, kynjahlutfalli og búsetu. Alls 15 luku verkefninu. SAGA ökuritinn, sem er hannaður og smíðaður af ND á Íslandi, skráir nákvæmlega akstursleiðir og ökuhraða og sýnir hvar og hvenær er farið yfir hámarkshraða eða gefið snöggt í, hemlað harkalega eða farið glannaleg í beygjur. Ökuritanum var komið fyrir í bílum ungmennanna og síðan fylgst nákvæmlega með akstri þeirra í þrjá mánuði, frá 15. júlí til 15. október. Samtals ók unga fólkið um 63 þúsund kílómetra á tímabilinu og tók aksturinn samanlagt 1.449 klukkustundir og 41 mínútu. Vegalengdin sem hver þátttakandi ók var þó mjög misjöfn eða frá 1.240 km upp í rétt tæpa 8.000 km. Þrátt fyrir misjafnt aksturslag fór helmingur hópsins aldrei upp fyrir 100 km hraða á klst. en fyrrnefndir þrír ökumenn þóttu þó skara fram úr hvað varðar gott aksturslag. "Við erum afskaplega ánægð með árangur þeirra en það sem skiptir þó mestu máli er að allir þátttakendurnir hafa með þessu öðlast góða og haldbæra reynslu af fyrirmyndaraksturslagi, sem þeir vonandi tileinka sér um alla framtíð." segir Ragnheiður Davíðsdóttir.