Óperan Tökin hert frumsýnd

Óperugestir, sem sjá óperuna Tökin hert, raula ekki endilega lögin fyrir munni sér eftir sýninguna - en hitt er víst, að uppsetning Íslensku óperunnar örvar ýmis fleiri skynfæri en heyrnina. Draugagangur og andlegt ofbeldi er snar þáttur í óperu Brittens, sem verður frumsýnd í kvöld, en ekki verða nema sex sýningar. Óperan byggist á spennusögu um munaðarlaus og vanrækt systkini sem afturgöngur reyna að ná á sitt vald. Tökin hert, eða The Turn of the Screw, er talin með bestu óperum 20. aldar. Hún er frumsýnd í kvöld, leikstjóri er Halldór E. Laxness, hljómsveitarstjóri Kurt Kopecky. Einsöngvarar eru auk undrabarnsins Ísaks Ríkharðssonar, Gunnar Guðbjörnsson, Hulda Björk Garðarsdóttir, Ólöf Kolbrún Harðardóttir, Hanna Dóra Sturludóttir og Þórunn Arna Kristjánsdóttir.