Útrýma verði kanínum í náttúrunni

Útrýma verður kanínum úr íslenskri náttúru áður en þær valda skaða á lífríkinu, segir Náttúrufræðistofnun, sem leggur til að sérþjálfaðir hundar og gas verði notað til verksins. Þær eru ósköp sætar, enda vinsælt gæludýr, og þannig námu þær land í íslenskri náttúru en þar eru þær ekki til yndis heldur skaða. Alvarlegust er staðan í Vestmannaeyjum þar sem kanínur, þúsundum saman, ógna lundabyggð, gera holur í golfvöllinn og naga trjágróður. Það þarf sérstakt leyfi til að drepa kanínur og það hafa Vestmanneyingar fengið frá umhverfisráðuneytinu undanfarin ár. Dýraverndarsamband Íslands krefst þess að ráðuneytið afturkalli þetta leyfi, það sé ólöglegt, kanínur séu búfé og ekkert sanni að þær valdi skaða á lundabyggð. Sigríður Anna Þórðardóttir umhverfisráðherra segir að ljóst sé að eins og þetta sé í Vestmannaeyjum þá séu kanínur þar hvorki gæludýr né bústofn, það er enginn sem ber ábyrgð á þeim þar sem engir eigendur eru. Þar að auki þá trufla þær varp lundans og niðurstaða rannsóknarverkefnis sem gert var sýndi að lundabyggð stafaði hætta af kanínunum. Það sem meira er, þá hefur Náttúrufræðistofnun árum saman lýst þeirri skoðun sinni að það beri hreinlega að útrýma kanínum úr íslenskri náttúru áður en þessi framandi tegund veldur meiri skaða. Náttúrufræðistofnun vill að kanínuveiðar verði gefnar frjálsar, að ekki þurfi sérstakt leyfi til að veiða kanínur. Sigríður Anna segir að það komi til greina og hún mun skoða það að setja slíkt ákvæði inn í lögin.   Náttúrufræðistofnun nefnir ýmsar leiðir sem hafa verið notaðar í útlöndum til að útrýma kanínum, eins og að sérþjálfaðir hundar snuðri þær uppi, eða nota gas sem er sett í kanínuholur og mun hafa gefist vel á Bretlandseyjum.