Tilboðið mistök

"Það kom okkur verulega á óvart hvað menn eru tilbúnir að greiða fyrir sérleyfisferðina," segir Þráinn Vigfússon, framkvæmdastjóri Kynnisferða. Í fyrradag voru opnuð tilboð í Ríkiskaupum í skóla- og áætlunarakstur á nokkrum sérleyfisferðum. Athygli vöktu svokölluð mínustilboð en nokkur fyrirtæki voru reiðubúin að greiða Vegagerðinni tugi og allt að 469 milljónir með leyfinu fyrir akstur frá Reykjavík til Suðurnesja. "Við buðum 27 milljónir og það er alveg á mörkunum að það borgi sig samkvæmt okkar útreikningum svo ég veit ekki hvernig þeir ætla að fara að sem vilja borga 469 milljónir fyrir það. Þetta hljóta að vera einhver mistök og ég á ekki von á því að Vegagerðin taki þessu boði," bætir hann við. Bjarni Björnsson, sem á sæti í stjórn Hópferðamiðstöðvarinnar og Vestfjarðaleiðar sem bauð 460 milljónir, vildi ekki tjá sig um útreikninganna sem liggja að baki tilboðinu eða hvort um einhver mistök væri að ræða. Þórir Garðarsson, hjá Allrahanda sem bauð 103 milljónir, segir að sérleyfið fyrir Suðurnes sé með margfalt meiri meðalnýtingu en flestar aðrar leiðir, sem geri það að verkum að fyrirtækið sé tilbúið að greiða slíka upphæð fyrir það. Félag hópferðaleyfishafa og Þingvallaleið hafa kært til kærunefndar útboðsmála vegna þeirra skilmála sem fylgja útboðinu en í því felst að þjónusta við Umferðarmiðstöðina sé notuð og greitt sé fyrir hana til rekstraraðila hennar en það er fyrirtækið Kynnisferðir sem jafnframt á tilboð í útboðinu. Einnig greiða samkeppnisaðilarnir aðstöðugjöld til Kynnisferða, segir Björn, sem einnig er í stjórn Félags hópferðaleyfishafa, og það gefi þeim betri stöðu þegar kemur að tilboðinu. Þráinn segir að Kynnisferðir hafi samið um jafnan aðgang allra að Umferðarmiðstöðinni, sem sé í raun eina boðlega endastöðin, og því eigi kæran ekki við rök að styðjast. Einhver verði að reka hana og Kynnisferðir hafi fengið beiðni frá sérleyfishöfum um að gera það og hafi kostað miklu til að standa undir því.