Stjórnkerfið brást í Bandaríkjunum

Stjórnkerfið brást að öllu leyti eftir náttúruhamfarirnar við Mexíkóflóa, viðurkenndi George Bush, forseti Bandaríkjanna, í sjónvarpsávarpi í gærkvöldi. Bush sagði að sem forseti landsins bæri hann ábyrgðina á því sem miður fór. Bush, sem staddur var í franska hverfinu í New Orleans, hét einhverri umfangsmestu uppbyggingu í sögunni á hamfarasvæðunum í Bandaríkjunum. Hann viðurkenndi að Bandaríkjastjórn hefði ekki brugðist við hamförunum sem skyldi og sagði að vandinn hefði reynst yfirþyrmandi fyrir þunglamalegt kerfi sem þyrfti að bæta. Hann sagði enn fremur að fjórum árum eftir atburðina ógnvænlegu 11. september ættu Bandaríkjamenn fullan rétt á að vænta árangursríkari viðbragða á neyðarstundu. Þegar alríkisstjórnin gerði ekki skyldu sína væri hann sem forseti ábyrgur fyrir vandamálunum og lausn þeirra. Hann hefði skipað öllum ráðherrum að taka þátt í ítarlegri rannsókn á viðbrögðum ríkisstjórnarinnar við fellibylnum. Bush sagði það óhugsandi að ímynda sér Bandaríkin án New Orleans og að hún myndi rísa úr rústunum  Ræða Bush vakti almennt góð viðbrögð en ýmsir efast þó um að forsetinn muni standa við gefin loforð. Hope Kitisin, íbúi í New Orleans, sagði ræðuna upplífgandi en nú væri að bíða og sjá hvort forsetinn gæti fylgt henni eftir og stillt saman alríkis- og borgarstjórnina til að gera eitthvað í málinu. Allir hlökkuðu til að hefja enduruppbygginguna á borginni og hún vonaði að forsetinn skuldbyndi sig til þess.