Viðræður hafnar um Enska boltann

Gunnar Björn Þórhallsson, framkvæmdastjóri Tengis á Akureyri segist ekki vita hvar eða hvernig Íslenska sjónvarpsfélagið afhendi Tengi sjónvarpsmerki félagsins vegna Enska boltans. Viðræður séu hafnar og hafi Tengir svarað spurningalista félagsins fyrir helgi. Nú sé beðið eftir viðbrögðum. "Ég geri ráð fyrir því að fá allar íslenskar stöðvar inn á ljósleiðaranetið sem við höfum. Þegar er Ríkissjónvarpið og Aksjón komið. Skjár einn hlýtur að fylgja með Enska boltanum og við erum búnir að senda fyrirspurnir um að fá Stöð 2 og Sýn inn á kerfið. Vonir standa til að viðskiptavinir okkar geti fengið allar sjónvarpsstöðvarnar í gegn um sömu tenginguna," segir Gunnar. Njörður Tómasson, framkvæmdastjóri Íslandsmiðils segir einnig að viðræður séu hafnar við Íslenska sjónvarpfélagið. "Ég fagna þessum úrskurði samkeppnisyfirvalda og geri ráð fyrir að nú geti flutningsfyrirtæki flutt allt það efni sem framleitt er á Íslandi og neytendur vilja fá. Það hefur verið gerð tilraun til að læsa efni inni á tilteknum dreifileiðum, en nú er verið að girða fyrir það. Það er aðeins verið að rjúfa þessi sterku tengsl á milli fjölmiðla og fjarskiptafyrirtækja."