Blóðbað í hverfi sjía-múslima

Á annan tug sprenginga urðu í miðborg Bagdad í gær, sem bönuðu að minnsta kosti 152 manns og særðu minnst 542. Spreningarnar byrjuðu með stórri sjálfsmorðs-bílsprengjuárás sem beint var gegn daglaunamönnum sem safnast höfðu saman á þessum stað í borginni í von um að fá vinnu þann daginn. Íraksdeild Al Kaída-hryðjuverkanetsins lýsti ábyrgð á tilræðunum á hendur sér. Fyrsta árásin var blóðugust. Þar fórust minnst 88 manns og 227 særðust. Hún var gerð í Kazimiyah-hverfinu, en flestir íbúar þar eru sjía-múslimar. Í fyrrinótt voru sautján menn teknir af lífi í þorpi norður af Bagdad, en að þeim meðtöldum var mannfallið í ofbeldisverkum síðasta sólarhrings í Bagdad og nágrenni komið upp í 169 manns. Háttsettur foringi í bandaríska herliðinu í Írak tjáði AP-fréttastofunni að hann teldi að árásirnar væru hefnd fyrir áhlaup bandarískra og íraskra hersveita í norður-írösku borginni Tal Afar, en markmiðið með því var að svæla uppreisnarmenn út úr fylgsnum sínum nærri landamærunum að Sýrlandi. Arabíska Al-Jazzeera-sjónvarpsstöðin hafði eftir talsmönnum Al Kaída að þetta mat væri rétt. Talið er að blóðbað gærdagsins hafi verið það næstversta sem orðið hefur í Írak frá því Bandaríkjamenn leiddu innrás í landið vorið 2003. Ári eftir innrásina, 2. mars 2004, dóu að minnsta kosti 181 og 573 særðust í samræmdum sprengjuárásum á helgar moskur sjía-múslima í Karbala og Bagdad. Er ofbeldið blossaði svo illilega upp á ný eftir tiltölulega rólega tíð undanfarnar vikur sat Íraksþing enn á rökstólum um endurbætur á drögum að nýrri stjórnarskrá, sem væru til þess fallnar að koma til móts við óánægju súnní-múslima, en það eru herskáir menn úr þeirra hópi sem eru uppistaðan í liði uppreisnarmanna. Íraskir stjórnmálaleiðtogar fordæmdu árásirnar. Husein al-Shahristani, varaforseti þingsins, sagði þær "villimannslegar og hrottalegar".