Stjórnlausar gripdeildir á Gaza

Palestínska lögreglan mátti sín lítils er múgur Palestínumanna stundaði gripdeildir í yfirgefnum landtökubyggðum gyðinga á Gaza-svæðinu í gær. Meðal annars var öllu verðmætu stolið úr fjölda gróðurhúsa sem bandarískir gyðingar höfðu keypt af landtökumönnum og fært í umsjá palestínsku heimastjórnarinnar, með það fyrir augum að Palestínumenn gætu nýtt þau áfram. Vaktstjórar palestínsku lögreglunnar sögðust vera allt of fáliðaðir til þess að fá rönd við reist. Að sögn vitna kom það meira að segja fyrir að lögreglumenn tóku sjálfir þátt í gripdeildunum. Að palestínska lögreglan skyldi ófær um að hindra skemmdarverk og gripdeildir eftir að Ísraelsher hafði sig á brott eftir áratugalangt hernám þykir ekki boða gott fyrir framtíð Gaza-svæðisins. Mahmoud Abbas, leiðtogi heimastjórnarinnar, brýndi í sjónvarpsávarpi fyrir þjóð sinni að lögleysa yrði ekki liðin.