Barnaníðings leitað í Smáralind

Lögreglan í Kópavogi rannsakar hvort barnaníðingur reyni að lokka til sín unga drengi í gegnum símasjálfsala í Smáralindinni. Málið kom upp á föstudag og vinna öryggisverðir verslunarmiðstöðvarinnar með lögreglu að málinu. Lögreglan rannsakar hvort rétt sé að maður noti símasjálfsala til að lokka til sín unga drengi. Í DV í dag er viðtal við konu sem veitti því eftirtekt að hringt var í símasjálfsalana og þegar fullorðnir svöruðu virtist sem enginn væri á línunni. Aftur á móti þegar börn svörðu leiddi það til samtals. Konan ræddi við börnin og kom þá í ljós að þeim yrði boðið sælgæti kæmu þau út í bíl. Björgvin Björgvinsson aðstoðaryfirlögregluþjónn í Kópvogi staðfestir að málið sé í rannsókn hjá þeim og segir þetta hafa komið upp síðastliðinn föstudag þegar öryggisverðir Í Smáralind höfðu samband við lögregluna og sögðu að verið væri að nota sjálfsala til þess að lokka pilta út í bíl. Eftir þessar upplýsingar hóf lögreglan eftirgrennslan og rannsókn og verið er að afla upplýsinga um málið. Björgvin segir að ábendingar um nokkur bílnúmer í sambandi við rannsókn málsins hafi ekki borið árangur, þar sem númerin hafi verið röng. Þá minnir hann á að alltaf geti verið um gabb að ræða en það þurfi að sjálfsögðu að athuga. Hann sagði jafnframt að að allar ábendingar af þessu tagi væru teknar alvarlega.