Ungbarnagrautur tekinn úr umferð

Ungbarnagrautur með yfir helmings markaðshlutdeild var tekinn úr umferð vegna þess að hann uppfyllti ekki evrópsk skilyrði. Misræmið kom bæði hinu opinbera og heildsalanum í opna skjöldu. Í bæklingi Manneldisráðs og Miðstöðvar heilsuverndar barna um næringu ungbarna er mælt með því að börnum á aldrinum 6-9 mánaða sé gefinn járnbættur ungbarnagrautur úr hreinu járnbættu mjöli en við sex mánaða aldurinn fer næringaþörf barnanna að aukast og járnbúskapur þeirra getur minnkað. Þá getur hættan á járnskorti aukist en aðaljárngjafar 6-8 mánaða gamalla barna eru ungbarnagrautar. Nú hafa Gerber-þurrgrautarnir verið teknir úr sölu en þeir hafa staðið landanum til boða í yfir tvo áratugi. Ásta Ágústsdóttir, markaðsfulltrúi hjá Íslensk-ameríska, segir ástæðuna vera þá að mismunandi reglugerð gildi um járnbætingu í barnamat á milli Evrópu og Bandaríkjanna og meira járnmagn sé í grautunum í Evrópu en sé leyfilegt. Engar nýlegar breytingar hafa verið gerðar á reglugerðinni hér á landi og enginn vissi af þessu misræmi í járninnihaldi grautsins fyrr en á þessu ári. Þar sem engin heimild er fyrir undanþágum í reglugerðinni var ekki annað í stöðunni en að taka þurrgrautinn úr sölu. Þó ber að taka fram að hér er ekki átt við krukkumatinn vinsæla því hann er framleiddur innan Evrópusambandsins og samkvæmt evrópskum reglugerðum. Til að mæta gapinu sem myndast í þurrmatnum mun Íslensk-ameríska flytja inn barnamat frá dönskum framleiðanda sem væntanlegur er í verslanir um miðjan mánuðinn.